Krasnoyarskda İbad Hüseynli ilə görüş: erməni işğalı və Xocalı soyqırımı ilə bağlı həqiqətlər çatdırılıb
Tarix: 25.02.2020 | Saat: 18:37:00 | E-mail | Çapa göndər


Xocalı soyqırımının 28-ci ildönümü ilə əlaqədar silsilə tədbirlərin tərkib hissəsi olaraq Krasnoyarskdakı Kuzneçov adına Sosial-mədəni kompleksdə “Etnik münaqişələr. Sovet keçmişinin dərsləri" mövzusunda panel-müzakirələr keçirilib. Diaspor Fəaliyyətinə Jurnalistlərin Dəstəyi İctimai Birliyinin təşəbbüsü, "Azərbaycan milli-mədəni muxtariyyəti" ictimai təşkilatının və Rusiyanın Azərbaycanlı Gənclər Təşkilatının Krasnoyarsk diyarı üzrə nümayəndəliyinin təşkilatçılığı ilə keçirilən tədbirin fəxri qonağı "Azərbaycan bayrağı" ordenli Qarabağ qazisi, xalq qəhrəmanımız İbad Hüseynli olub. Tədbirdə soydaşlarımızla yanaşı, Rusiya və Azərbaycanın tanınmış politoloqları, ictimai xadimlər, Krasnoyarsk rəsmiləri, tələbələr, eləcə də digər xalqların diaspor üzvləri və yerli KİV-lər iştirak ediblər.
Müzakirəni Rusiya Federasiyası Dövlət Dumasındakı Rusiya Xalqları Gəncləri Şurasının üzvü Kamran Rüstəmzadə açaraq qonaqları təqdim edib.
Krasnoyarsk diyarı "Azərbaycan milli-mədəni muxtariyyəti" ictimai təşkilatı sədrinin müavini Ayaz Məmmədov çıxış edərək bildirib ki, Krasnoyarskda Azərbaycan diasporu tərəfindən hər il Xocalı soyqırımı ilə bağlı müxtəlif səpkili tədbirlər təşkil edilir: "Azərbaycan xalqının tarixinə 1992-ci il fevralın 25-dən 26-na keçən gecə Xocalı faciəsi kimi daxil olub. Ermənistan silahlı qüvvələri bütün beynəlxalq hüquq normalarına zidd olaraq, yatan şəhərə hücum edərək azərbaycanlılara qarşı soyqırımı aktını törədiblər. Dünya birliyi erməni canilərinin törətdiyi vəhşiliklərə hüquqi qiymət verməlidir. Xocalı şəhərini tarixdə görünməmiş vəhşiliklə yerlə-yeksan edən, dinc sakinləri amansız şəkildə qətl edən erməni terrorçularına qarşı hələ də bütün dünya susur və hüquqi qiymət verməkdən boyun qaçırır. Beynəlxalq aləm Xocalı qətliamını tanımalı, bu qanlı qətliama qarşı ölçü götürməli, Sərkisyan, Köçəryan və eləcə də bu dəhşətli qətliamı törədən bütün hər kəs beynəlxalq hüquq və məhkəmə orqanları qarşısında cavab verməlidir! Və ümid edirik ki, bir gün Ermənistan və bu qətliamı törədənlər hüquq qarşısında cavab verəcəklər! Allah bütün şəhidlərimizə rəhmət etsin".
Sonra Azərbaycanın ərazi bütövlüyü uğurunda şəhid olan vətən övladları bir dəqiqəlik sükutla anılıb.
Moderator Kamran Rüstəmzadə bildirib ki, müasir zamanda qlobal problemlərin həlli hər bir insanın şəxsi istəyindən asılıdır: "Elə buna görə də bu gün ictimai təşkilatlar xalqlar arasında dialoqun yaradılmasında böyük rol oynayır. Mən əminəm ki, bizim həmvətənlərimizin fəal vətəndaşlıq mövqeyi Azərbaycanın ərazi bütövlüyünü təmin etməyə imkan verəcək və bir daha Xocalı faciəsi təkrar olmayacaq. Bu baxımdan Krasnoyarskda yaşayan soydaşlarımızla əfsanəvi qəhrəman İbad Hüseynlinin görüşünü alqışlayıram".
Krasnoyarsk diyarı qubernatorunun ekspert və analitik şöbə müdirinin müavini, politoloq Pavel Klaçkov çıxış edərək deyib ki, bu gün Azərbaycan güclü və dinamik inkişaf edən dövlətdir: "Artıq bir neçə ildir ki, Azərbaycan Rusiya və ABŞ müdafiə qurumları liderlərinin görüşdükləri məkandır. Münhen Təhlükəsizlik Konfransı göstərdi ki, Azərbaycanın çox savadlı və təcrübəli, beynəlxalq gündəmi çox yaxşı bilən və Azərbaycanın Dağlıq Qarabağ məsələsi ilə bağlı mövqeyini dinləyicilərə aydın, dəqiq çatdıran lideri var. Bütün bunlar Azərbaycan üçün Dağlıq Qarabağ münaqişəsinin həllinə çox gözəl şərait yaradır". ADDIM Gənclər Təşkilatının sədri Hüseyn Cavadzadə Qarabağ qazisi İbad Hüseynlinin qəhrəmanlığından və onun şücaətini təbliğ etməyin əhəmiyyətindən danışıb. Hüseyn Cavadzadə bildirib ki, missiyaları canlı qəhrəmanımızı təbliğ edib tanıtmaqdır: "İbad Hüseynli bu gün təkcə Azərbaycanın yox, bütün türk dünyasının qəhrəmanıdır. Çünki İbad Hüseynli tərəfindən Monte Melikonyanın öldürülməsindən sonra, demək olar ki, Dağlıq Qarabağ müharibəsi dayanıb.
Qarabağ məsələsi hər zaman bizim əsas mövzudur". ADDIM sədri, həmçinin qeyd edib ki, İbad Hüseynli qəhrəman olaraq gənclərə və gələcək nəsillərə nümunədir. Krasnoyarsk diyarı üzrə “Azərbaycan milli-mədəni muxtariyyəti”nin idarə heyətinin üzvü, din xadimi Hacı Müttəlib şəhidlik zirvəsinə ucalmağın önəmindən danışıb. O, məlumat verib ki, fevralın 26-da şəhərin məscidində şəhidlərin ruhuna dualar oxunacaq və ehsan süfrəsi təşkil ediləcək.
Müzakirədən sonra Qarabağ qazisi İbad Hüseynlinin soydaşlarımızla görüşü olub. Ardınca İbad Hüseynli haqqında ADDIM Gənclər Təşkilatı tərəfindən hazırlanan “Əfsanəvi qəhrəman” filminin ilk dəfə təqdimatı olub. İbad Hüseynli ona göstərilən diqqətə görə hər kəsə təşəkkür edərək deyib ki, Qarabağ müharibəsində iştirak etməklə vətən qarşısında milli borcunu yerinə yetirib. Qəhrəmanımız tədbirdə ermənilərin Xocalı soyqırımında soydaşlarımıza qarşı etdikləri zülmlərdən danışıb: "Bizim gücümüz birliyimizdədir. Mən Krasnoyarskda soydaşlarımız arasında bu birliyi hiss etdim və qürur duydum. Biz düşmənə öz birliyimizlə qalib gələ bilərik".
İbad Hüseynlinin Krasnoyarska təşrif buyurması soydaşlarımızın ruh yüksəkliyini artırıb. Soydaşlarımız əfsanəvi qəhrəmanla görüşdən məmnun qalaraq onu böyük sevgi və coşğu ilə qarşılayıblar. 400 nəfərlik zalda böyük izdiham yaşanıb. İbad Hüseynlinin həyat və döyüş yolundan bəhs edən tanıtım filmini seyr edən iştirakçılar duyğulu anlar yaşayaraq, ayağa qalxıb Qarabağ qazisinə öz dərin ehtiramlarını bildiriblər. Tədbirin sonunda həmvətənlərimiz böyük həvəslə türk dünyasının qəhrəmanı ilə xatirə şəkilləri çəkdiriblər.
Tədbirlə bağlı təəssüratlarını bölüşən Rusiyadakı həmyerlimiz, hüquqşünas, ictimai xadim Səadət Qarayeva bildirib ki, xaricdə canlı qəhrəmanlarımızla belə görüşlərin keçirilməsi soydaşlarımızın vətənpərvərlik hissinin yüksəlməsinə xidmət edir: "Xocalı faciəsi hər bir azərbaycanlının ağrı, acısıdır. Vətəndən kənarda böyüyən nəslə bu tarixi faciənin unudulmaması üçün belə tədbirlərin keçirilməsi vacibdir". Yeri gəlmişkən, Krasnoyarskdakı Azərbaycan diasporunun üzvlərinin bu və digər fəaliyyətləri Diaspor Fəaliyyətinə Jurnalistlərin Dəstəyi İctimai Birliyinin sədri Fuad Hüseynzadə tərəfindən qiymətləndirilib. Belə ki, Krasnoyarsk Deputatlar Şurasının millət vəkili, yerli “Azərbaycan milli-mədəni muxtariyyəti” ictimai təşkilatının sədri Taleh Mahmudov Rusiya Federasiyasında Azərbaycanın təbliği, tanınması, o cümlədən soydaşlarımızın birliyi və həmrəyliyi yolunda əzmkar fəaliyyətinə görə DFJD sədri Fuad Hüseynzadə tərəfindən Fəxri fərmanla təltif olunub.
Öz növbəsində Qarabağ qazisi İbad Hüseynli və DFJD sədri Fuad Hüseynzadə də Taleh Mahmudov tərəfindən Fəxri fərmanla təltif ediliblər. Taleh Mahmudov İbad Hüseynliyə cansağlığı və gələcək fəaliyyətlərində uğurlar arzu edərək bildirib ki, diasporumuz belə qəhrəmanlarımızla hər zaman fəxr edir.

Cənubi Koreya mətbuatı Xocalı soyqırımından yazır

Yeri gəlmişkən, bir çox dünya mətbuatında Xocalı faciəsi geniş işıqlandırılıb. Cənubi Koreyanın kütləvi informasiya vasitələrində, o cümlədən “The Korea Post”, “The Seoul Times”, “The Korea Times” qəzetlərində Xocalı soyqırımının 28-ci ildönümü ilə əlaqədar məqalələr dərc olunub.
Məqalələrdə 1992-ci il fevralın 25-dən 26-na keçən gecə Ermənistan silahlı qüvvələrinin keçmiş SSRİ-nin motoatıcı alayı ilə birgə Xocalı şəhərini zəbt edərək Azərbaycan xalqına qarşı soyqırımı həyata keçirdiyi bildirilib. Qeyd olunub ki, Xocalının işğalı zamanı bir gecədə dinc əhalidən 613 nəfər, о cümlədən 63 uşaq, 106 qadın, 70 qoca xüsusi amansızlıqla, işgəncələrlə öldürülüb, yüzlərlə insan əsir və girov götürülüb, itkin düşüb, şəhər yerlə-yeksan edilib, evlər və sosial infrastruktur tamamilə dağıdılıb.
Xocalı soyqırımının iştirakçıları mülki şəxslərə qarşı törətdikləri cinayətkar əməllərini etiraf ediblər. Ermənistanın sabiq prezidenti, Xocalı soyqırımı iştirakçısı Serj Sarkisyanın “Xocalıdan əvvəl azərbaycanlılar düşünürdülər ki, ermənilər mülki insanlara əl qaldırmazlar. Amma biz bu stereotipi sındıra bildik” fikri məqalələrdə əksini tapıb.
Qeyd olunub ki, həmin günlərdə “Sunday Times”, “Financial Times”, “ The Times”, “İzvestiya”, “Le Monde”, “Crual L`Eveneman” kimi nəşrlər Xocalıda törədilən qanlı hadisələr barədə məqalələr dərc ediblər.
Cənubi Koreya qəzetlərinin məqalələrində Xocalıda baş verənlərin müvafiq beynəlxalq sənədlərə əsasən soyqırımı aktı olduğu, Xocalı faciəsinin Holokost, Xatın, Lidisa, Oradur, Srebrenitsa soyqırımından heç bir fərqinin olmadığı vurğulanıb.
Məqalələrdə Heydər Əliyev Fondunun vitse-prezidenti Leyla Əliyeva tərəfindən başladılan “Xocalıya Ədalət” beynəlxalq məlumatlandırma kampaniyası çərçivəsində görülmüş işlərdən geniş söz açılıb. Bildirilib ki, kampaniya nəticəsində dünya ictimaiyyətində Xocalıda beynəlxalq humanitar hüququn və insan haqlarının pozulduğuna dair qlobal məlumatlılıq artıb, bir neçə beynəlxalq təşkilat, bəzi ölkələrin parlamentləri və ABŞ-ın 21 ştatı Xocalı soyqırımını tanıyıb və pisləyib.
Nigar Abdullayeva




 
Bölməyə aid digər xəbərlər
29.03.2020
Ukrayna saytında 31 mart - Azərbaycanlıların Soyqırımı Gününə dair məqalə dərc edilib
19.03.2020
“Ermənistan bu günün özündə də sülh şəraitində yaşayan insanları öldürür”
17.03.2020
“Ermənistan-Azərbaycan, Dağlıq Qarabağ münaqişəsi ilə bağlı tarixi həqiqətləri dünyaya çatdırmalıyıq”
16.03.2020
“Ermənistanın tarix və demokratiya məsələlərində Azərbaycana qarşı iddia irəli sürməyə heç bir əsası yoxdur”
16.03.2020
Moskva beynəlxalq müqaviləsi Naxçıvana erməni iddialarını birmənalı şəkildə rədd edir

Şərh əlavə olunmayıb

    ,    
Tural Tağıyev
Anar MİRİYEV
Ağasəf Babayev
Fuad HÜSEYNZADƏ
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 11496

1 Tural İsmayılov: “İndiki halda cəmiyyətdə milli birlik və məsuliyyət bir nömrəli amildir”
2 Ukrayna saytında 31 mart - Azərbaycanlıların Soyqırımı Gününə dair məqalə dərc edilib
3 Dilşad Musadan karantin günləri ilə bağlı valideynlərə tövsiyələr!
4 İtalyan mətbəxindən “Osso Bucco“-VİDEO
5 Türkiyədə azan vaxtı çəkilən bu video heyrətə gətirdi-VİDEO


© Copyright 1999-2019 "Palitra" müstəqil ictimai-siyasi qəzet
Azərbaycan, Bakı ş. Xətai rayonu, M.Mehdizadə-5, giriş 2
Tel/Fax.: (+99412) 489 08 53
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info