Mehmet Karaca: İnanıram ki, Bakı Ali Neft Məktəbi çox tezliklə regionda söz sahibi olacaq
Tarix: 12.03.2020 | Saat: 13:59:00 | E-mail | Çapa göndər


Bakı Ali Neft Məktəbinin (BANM) rektoru Elmar Qasımovun dəvəti ilə İstanbul Texnik Universitetinin (İTU) rektoru, professor Mehmet Karacanın rəhbərlik etdiyi nümayəndə heyəti BANM-də olub. Səfər çərçivəsində Bakı Ali Neft Məktəbinin rəhbərliyi və professor-müəllim heyəti ilə görüşlər keçirilib və nəticədə BANM ilə İTU arasında əməkdaşlığa dair memorandum imzalanıb. İstanbul Texnik Universitetinin rektoru, professor Mehmet Karaca ilə müsahibəni təqdim edirik:

- İlk olaraq Bakı haqqında təəssüratlarınızı bilmək istərdik?

- Bu, mənim Bakıya dördüncü səfərimdir. Hər dəfə gələndə Bakını çox fərqli rakurslardan kəşf edirəm. Bakı min illər əvvəl əsası qoyulmuş qədim şəhər ab-havası ilə müasirliyin harmoniyasını ehtiva edir. Məhz bu cəhəti ilə Bakı məni təsirləndirir. Həmçinin şəhər geniş küçələri, mədəni və gülərüz insanları ilə göz oxşayır. Düşünürəm ki, Bakıya növbəti gəlişimdə də yenə fərqliliklərin şahidi olacam.

- İstanbul Texnik Universitetinin fəaliyyətini uğurlu edən nədir?

- İstanbul Texnik Universiteti Türkiyənin təxminən 247 illik tarixə malik ən qədim və mühəndislik sahəsində ən nüfuzlu universitetlərindəndir. Burada ciddi bir universitet ənənəsi formalaşıb. İstanbul Texnik Universiteti yeni nəsil universitetlər üçün nümunə sayılacaq ali təhsil müəssisəsidir. Belə ki, bizim universitet dünya trendlərinə ən tez uyğunlaşan və yeniliklərə ən çox açıq universitetlər siyahısında ən qabaqcıl ali təhsil müəssisələrindəndir. İstanbul Texnik Universiteti həm də Türkiyədə böyük nüfuza sahib məzunların yetişdirilməsi ilə diqqət çəkir. Bizim məzunlar içərisində tanınmış şirkət rəhbərləri, Türkiyənin ictimai-siyasi həyatında mühüm rol oynamış və Türkiyə xalqının baxışını formalaşdırmış liderlərdən Süleyman Dəmirəl, Turqut Özal, Nəcməddin Ərbakan kimi nüfuzlu şəxsiyyətlər var. Bundan əlavə, Türkiyədə tikinti podratçılarının yetişdirilməsində bizim universitet mühüm rol oynayır: 10 podratçıdan 8-i bizim məzunların payına düşür.

- Bakı Ali Neft Məktəbində təhsil üçün yaradılan şəraiti necə dəyərləndirirsiniz?

- Öncə onu deyim ki, ali məktəbinizdə olmaqdan qürur və şərəf duyuram. Başda rektor Elmar Qasımov olmaqla, bizi qarşılayan bütün əməkdaşlarınızın qonaqpərvərliyindən çox məmnun qaldım. Buna görə bütün heyətə təşəkkür edirəm.
Qeyd etmək istəyirəm ki, Bakı Ali Neft Məktəbi 8 ildə inanılmaz dərəcədə inkişaf edib, bir ali təhsil müəssisəsinin qazana biləcəyi uğurları çox qısa zamanda əldə edə bilib. Ən əsası, ali məktəb komandası ilə məni çox təsirləndirdi. Komandada olan insanlar qlobal düşüncəyə, baxışa sahibdir. Bütün heyətin gözündə işıq gördüm, onların yeniliklər və inkişaf üçün açıq və həvəsli olduqlarını hiss etdim. Ali məktəbin qoyduğu hədəflər və gözləntilər də böyükdür. Düşünürəm ki, komandadakı insanlar bu enerji ilə qoyulmuş hədəflərə çatacaqlar. Azərbaycanın dünya standartlarına cavab verən, gələcəyin mühəndislərinin yetişdirilməsində BANM ölkə təhsilində ciddi rol oynayır. Əminəm ki, Bakı Ali Neft Məktəbi çox tezliklə regionda söz sahibi olacaq.

- İstanbul Texnik Universiteti Bakı Ali Neft Məktəbi ilə hansı istiqamətdə əməkdaşlıq edəcək?

- Təbii ki, əməkdaşlığımızın əsas ana xətti mühəndislik sahəsində olacaq. Bundan əlavə, bilgi texnologiyaları, süni zəka ilə bağlı işlər də planlaşdırılır.
Hələlik üç istiqamət müəyyən etmişik. İlk olaraq Bakı Ali Neft Məktəbində kompüter mühəndisliyi ixtisasını formalaşdırmaq və onun icrası ilə bağlı bütün detallar üzərində işləməyi düşünürük. İkinci istiqamət kimi ortaq layihələr, birgə fəaliyyət imkanları, tələbə mübadiləsi proqramlarının genişləndirilməsi nəzərdə tutulur. Üçüncü istiqamət isə odur ki, BANM-də texnoparkla bağlı Startap Mərkəzi qurmağı hədəfləyirik.




 
Bölməyə aid digər xəbərlər
03.04.2020
“Petkim”in mövcudluğu Türkiyə üçün qürur mənbəyidir
02.04.2020
“Dövlət tərəfindən iqtisadiyyatın sabitləşməsi üçün bütün lazımi addımlar atılır”
01.04.2020
Fəaliyyətini şəffaf quran, işçilərlə əmək müqavilələri bağlayan sahibkarlar dəstəkdən daha çox faydalanacaqlar
01.04.2020
“Koronavirusla bağlı dövlət tərəfindən atılan addımlara xalqımız evdə qalmaqla dəstək olmalıdır”
31.03.2020
Əfsanə Şükürova: “Yeni qadağalar insanların təhlükəsizliyini gücləndirmək üçündür”

Şərh əlavə olunmayıb

    ,    
Tural Tağıyev
Anar MİRİYEV
Ağasəf Babayev
Fuad HÜSEYNZADƏ
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 11496

1 Tural İsmayılov: “İndiki halda cəmiyyətdə milli birlik və məsuliyyət bir nömrəli amildir”
2 Ukrayna saytında 31 mart - Azərbaycanlıların Soyqırımı Gününə dair məqalə dərc edilib
3 Dilşad Musadan karantin günləri ilə bağlı valideynlərə tövsiyələr!
4 İtalyan mətbəxindən “Osso Bucco“-VİDEO
5 Türkiyədə azan vaxtı çəkilən bu video heyrətə gətirdi-VİDEO


© Copyright 1999-2019 "Palitra" müstəqil ictimai-siyasi qəzet
Azərbaycan, Bakı ş. Xətai rayonu, M.Mehdizadə-5, giriş 2
Tel/Fax.: (+99412) 489 08 53
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info