“Dövlətçiliyin təməllərinin qorunmasında milli-mənəvi dəyərlərin müstəsna rolu var”
Tarix: 19.12.2013 | Saat: 21:53:00 | E-mail | Çapa göndər


Samir Mehdizadə: “Milli-mənəvi dəyərlərə hörmət edən yeniyetmə və gənclərimiz cəmiyyətdə mütləq əksəriyyət təşkil edir”

“Resurs” Gənclərin İnkişafı İctimai Birliyi 2005-ci ildə yaradılıb. Fəaliyyət istiqamətləri gənclərin vətənpərvərlik, azərbaycançılıq, dövlətçilik hisslərinin artırılmasını təbliğ etməkdir. Eyni zamanda gənclərin Vətənə məhəbbət, Vətənə sədaqət ruhunda tərbiyə olunmaları, dövlət rəmzlərinə hörmət, onların hərtərəfli inkişafına kömək edilməsi də təşkilatın başlıca məqsədlərindəndir.“Resurs”un sədri Samir Mehdizadə bu istiqamətlərdə fəaliyyətləri ilə bağlı qəzetimizə müsahibə verib.

-Dövlətçilik təməllərinin qorunmasında milli-mənəvi dəyərlərin hansı rolu var?
-Dövlətçiliyin təməllərinin qorunmasında milli-mənəvi dəyərlərin müstəsna rolu var. Belə ki, min illərlə qorunub saxlanmış dəyərlərimizə hörmət etməyən vətəndaşdan dövlətçiliyin qorunması istiqamətində hər hansı fəaliyyət gözləmək mümkün deyil. Müstəqilliyin əldə olunması, müstəqil dövlətin yaradılması nə qədər çətindirsə, qurulmuş dövlətçiliyin, onun təməl prinsiplərinin qorunub saxlanılması daha da çətindir. Ona görə də, hər birimiz bu istiqamətdə öz bilik və bacarıqlarımızdan istifadə edərək xalqımıza, millətimizə, dövlətimizə xidmətlərimizi əsirgəməməliyik.
- Milli-mənəvi dəyərlərin qorunması istiqamətində hansı layihələr həyata keçiribsiniz?
-Mən “Resurs” GİİB-nin sədri olmaqla bərabər, Gənclər və İdman Nazirliyi yanında Gənclərlə İş üzrə İctimai Şuranın “Gənclərin mənəvi-əxlaqi və vətənpərvərlik tərbiyəsi məsələləri üzrə” komissiyasının sədri kimi də fəaliyyət göstərirəm. Həm QHT rəhbəri, həm də komissiya sədri kimi bu istiqamət, fəaliyyətimizdə prioritet təşkil edir. Millətin yaşaması, mövcud olması onun ana dilinə, mədəniyyətinə, adət-ənənələrinə, tarixinə, ədəbiyyatına bağlılığından asılıdır. Təşkilat olaraq gənclərin Azərbaycan dilinə, Azərbaycan ədəbiyyatına, Azərbaycan tarixinə sevgisini, bağlılığını artırmaq üçün müxtəlif istiqamətlərdə layihələr həyata keçiririk ki, bu da bizim fəaliyyətimizin başlıca istiqamətlərindəndir.
Son illərdə həyata keçirdiyimiz layihələr müxtəlif istiqamətləri əhatə edir. 2011-ci ildə akademik Ramiz Mehdiyevin Ermənistan prezidentinin absurd çıxışına cavab olaraq yazdığı “Gorus-2010 Absurd teatrı mövsümü” kitabının ictimai müzakirəsini təşkil etdik. Daha sonra kitabın müzakirəsi Ucar Rayon İcra Hakimiyyətində geniş müzakirə edildi və orada yazılan tutarlı faktlar ictimaiyyətin diqqətinə çatdırıldı. Yeni Azərbaycan Partiyasının Nizami Rayon Təşkilatında keçirilən müzakirə isə Nizami RİH-nin başçısının və millət vəkillərinin iştirakı ilə təşkil edildi.
Prezident yanında QHT-lərə Dövlət Dəstəyi Şurası ilə sıx əməkdaşlığımız davam edir. Şuranın dəstəyi ilə təşkilatımız tərəfindən müxtəlif istiqamətlərdə bir neçə layihə icra edilib. “Bakı şəhərinin məhəllələrində ekoloji vəziyyətin monitorinqi”, “Təhsil müəssisələrində narkomaniya əleyhinə təbliğat işlərinin aparılması” və digər layihələr ictimai əhəmiyyətinə görə xüsusi qeyd edilməlidir. Prezident yanında Gənclər Fondu yaradılandan təşkilatımızın təqdim etdiyi layihələrə diqqətlə yanaşılıb. “Gənclər arasında ekoloji maarifləndirmə işlərinin aparılması”, “Bakı İnklüziv Gənclik İdman Festivalları” layihələri fondun dəstəyi ilə uğurla icra edilib. Gənclər və İdman Nazirliyi də bizim təqdim etdiyimiz “Gənclərin zərərli vərdişlərdən qorunması üçün kütləvi tədbirlərin keçirilməsi” layihəsini dəstəkləyib. Bu layihə də uğurla icra olunub.
Lakin biz təkcə qrant layihələri hesabına yox, öz daxili imkanlarımız, üzvlərimizin könüllülük prinsiplərinə əsaslanan layihələr də icra edirik. Beynəlxalq Mətbuat Mərkəzində “Milli Qurtuluş Günü”nə həsr edilmiş “Heydər Əliyev - Müasir Azərbaycan dövlətçiliyinin xilaskarı” mövzusunda keçirdiyimiz konfransda QHT nümayəndələri ilə yanaşı, millət vəkilləri Fəttah Heydərov, Elmira Axundova, Sevinc Hüseynova da iştirak edərək ümummilli lider haqqında xatirələrini gənclərlə bölüşdülər. “Narkomaniyaya yox deyək!” şüarı ilə Bakı şəhəri, Nizami rayonunun bir çox ümumtəhsil məktəblərində kütləvi tədbirlər keçirərək, yeniyetmə və gənclərin maariflənmələrinə yardımçı olmuşuq. Bu tədbirlərə bir çox dövlət orqanlarının nümayəndələri - Nizami Rayon İcra Hakimiyyəti, Bakı şəhər Baş Polis İdarəsinin İctimai Təhlükəsizlik İdarəsi, Nizami Rayon Polis İdarəsinin əməkdaşları da cəlb edilib, gənclərin müvafiq sualları cavablandırılıb.
Kütləvi informasiya vasitələri ilə də geniş əlaqələrimiz yaradılıb. Belə ki, yuxarıda qeyd etdiyim layihələr “İctimai TV”, “Space TV”, “Xəzər TV”, SİA, “Trend”, “Xalq qəzeti”, “Yeni Azərbaycan”, “İki Sahil” və digər KİV-lər tərəfindən işıqlandırılıb.
-Azərbaycançılıq ideologiyası və milli-mənəvi dəyərlərimizin gəncləri müasir dövrdə mənfi stereotiplərdən qorumaq baxımından nə kimi rolu var?
-Azərbaycançılıq ideologiyasına, milli-mənəvi dəyərlərə hörmət edən yeniyetmə və gənclərimiz cəmiyyətdə mütləq əksəriyyət təşkil edir. Lakin hesab edirəm ki, bu işlər daim yüksələn xətlə inkişaf etdirilməlidir ki, formalaşma dövründə olan gənclərimiz mənfi stereotiplərdən, müxtəlif zərərli vərdişlərdən uzaq olsunlar. Cəmiyyətin sağalmaz bəlası olan narkomaniya, alkoqolizm və digər amillər bizi ayıq olmağa, bir an da olsun sayıqlığı itirməməyə məcbur edir. Dahi ulu öndərimizin bizə miras qoyduğu azərbaycançılıq ideologiyasının, Vətən sevgisinin gənclərimizin qanına, ruhuna hopdurulması üçün gərgin işləməli, zəhmət çəkməliyik. Vətənini sevən, milli dəyərlərə hörmətlə yanaşan gənc heç zaman mənfi, zərərli vərdişlərə aludə olmaz, əsl vətəndaş kimi yetişərək dövlətin inkişafına öz töhfəsini verər.
-Vətənpərvərliyin artırılmasında milli adət-ənənələrimizin hansı rolu var?
-Xalqımızın zəngin adət-ənənələri var. Gənclərin və yeniyetmələrin vətənpərvərlik hisslərinin gücləndirilməsi qarşımızda duran ümdə məsələlərdən ən birincisidir. Torpaqlarımızın böyük hissəsinin hələ də düşmən işğalı altında qaldığını nəzərə alsaq, bu istiqamətdə təxirəsalınmaz işlərin görülməsi zəruridir. Xalqımızın ümummilli lideri Heydər Əliyevin fikrini hər zaman fəaliyyətimizdə rəhbər tuturuq: “Vətənpərvərlik insanın daxilindəki duyğulardır. Vətənpərvər olmayan şəxs mənəviyyatsızdır!”.
- Gənclərin vətənpərvərlik ruhunu necə artırmaq olar?
-Gənclərin vətənpərvərlik ruhunun artırılması istiqamətində Azərbaycan Respublikasının Prezidenti cənab İlham Əliyevin tapşırıq və tövsiyələrinə əsasən müxtəlif tədbirlər həyata keçirilir. Belə ki, həm Prezident yanında QHT-lərə Dövlət Dəstəyi Şurası, həm Prezident yanında Gənclər Fondu, həm də Gənclər və İdman Nazirliyi QHT-lərin gənclərin vətənpərvərlik hisslərinin artırılmasını nəzərdə tutan layihələrini daim dəstəkləyir, onlara maliyyə vəsaiti ayırırlar. Bu yöndə əlbəttə ki, kütləvi informasiya vasitələrinin imkanları böyükdür. Təklif edərdim ki, KİV-lərdə, xüsusən də televiziya kanallarında bayağı verilişlərin əvəzinə vətənpərvərlik haqqında verilişlərin sayı çoxaldılsın. TV-lər tərəfindən təkliflər gələrsə, materialların toplanması, müxtəlif tədbirlərin təşkil olunması və keçirilməsi baxımından istənilən köməyi etməyə hazırıq.
- Hazırda bu istiqamətdə hansı işlər görürsüz?
-Gənclərin vətənpərvərlik hisslərinin artırılması, onlarda vətən sevgisi, torpaq sevgisini daha da artırmaq üçün təşkilatımız daim müxtəlif layihələr həyata keçirir. Hazırda təşkilatımız tərəfindən Prezident yanında Gənclər Fondunun dəstəyi ilə “Vətənin müdafiəsinə hazır ol!” layihəsi həyata keçirilir. Layihə çərçivəsində Bakı şəhərinin Nizami rayonunda fəaliyyət göstərən orta ümumtəhsil məktəblərində gənclərlə görüşərək milli qəhrəmanların keçdiyi şərəfli döyüş yolları haqqında onları məlumatlandırırıq.
-Tələbə və gənclərin intellektual səviyyəsinin yüksəldilməsi üçün nələr edilməlidir?
-Tələbə və gənclərin bilik səviyyəsinin yüksəldilməsində əlbəttə ki, onlara dərs deyən müəllimlərin rolu əvəzsizdir. Lakin müəllim faktoru ilə yanaşı gənclərimiz özləri də təhsilə maraq göstərməli, çoxlu mütaliə etməlidirlər ki, intellektual səviyyələri yüksəlsin. Mən Bekonun bir kəlamını xatırlatmaq istərdim: “Bilik - həyatda faydalı olmaq naminə qazanılmalıdır”. Bilikli, savadlı olaraq xalqına, millətinə xidmət etməkdən şərəfli vəzifə yoxdur!
- Perspektivdə hansı layihələr gözlənilir?
-Perspektivdə gənclərin intellektual inkişafı, vətənpərvərlik hisslərinin artırılması, onları zərərli vərdişlər haqqında maarifləndirərək gələcəkdə bu kimi keçici hallara maraq göstərməmələri üçün təbliğat işlərini gücləndirmək istiqamətində layihələr həyata keçirməyi planlaşdırırıq.
Fuad Hüseynzadə





 
Bölməyə aid digər xəbərlər
20.02.2020
BMT-də Dağlıq Qarabağ münaqişəsi barədə həqiqətlər səsləndirilib
20.02.2020
Xocalı soyqırımının 28-ci ildönümü ilə əlaqədar silsilə tədbirlər davam edir
18.02.2020
Erməni işğalı və Xocalı soyqırımı dünya mediasının gündəmində
18.02.2020
David Mkrtçyan: “Paşinyanın uğursuzluğu hazırkı hökumətin də imicini zərbə altına qoyub”
17.02.2020
Qaradağlı faciəsi dünya ictimaiyyətinə çatdırılır

Şərh əlavə olunmayıb

    ,    
Anar MİRİYEV
Ağasəf Babayev
Fuad HÜSEYNZADƏ
Tural Tağıyev
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 11453

1 “Qarabağda Ermənistanin heç biri tarixi irsi yoxdur” mövzusunda konfrans keçirilib
2 Tural İsmayılov: “İtaliya Azərbaycanın ərazi bütövlüyünü, münaqişənin ədalətli və beynəlxalq hüquq əsasında həllini dəstəkləyir”
3 “Bu ilin “Könüllü ili” elan olunması gənclərin inkişafı üçün böyük təkandır”
4 Münhen dərsi: Prezident bütün dünyaya sübut etdi ki, Qarabağ Azərbaycandır!
5 Altı il ərzində Ermənistanın dövlət borcu iki dəfə artıb


© Copyright 1999-2019 "Palitra" müstəqil ictimai-siyasi qəzet
Azərbaycan, Bakı ş. Xətai rayonu, M.Mehdizadə-5, giriş 2
Tel/Fax.: (+99412) 489 08 53
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info