Beynəlxalq festival çərçivəsində “Azərbaycan günü”
Tarix: 26.08.2015 | Saat: 00:19:00 | E-mail | Çapa göndər


Koreya Respublikasının Qyonsanbuk əyalətində keçirilən Qyonqcu İpək Yolu festivalı çərçivəsində "Azərbaycan günü” adlı konsert proqramı təşkil edilib. BMT-nin ixtisaslaşmış qurumu olan Dünya Turizm Təşkilatının dəstəyi ilə təşkil edilən və qədim İpək yolu üzərindəki ölkələr arasında tarixən mövcud olmuş mədəni əlaqələri günümüzdə yenidən qurmaq, inkişaf etdirmək, habelə mədəniyyət mübadiləsi ilə dünyada sülh prosesinə töhfə vermək məqsədi daşıyan festivalın proqramına daxil olan milli günlərdən birincisi Azərbaycana həsr olunmuşdu.
Konsertin açılış mərasimində çıxış edən Qyonqcu şəhərinin meri Çoi Yanq-şik qədim İpək yolunun ortasında yerləşən Azərbaycanın Qərb və Şərqi birləşdirdiyini deyib. O, Azərbaycanın özünəməxsus zəngin mədəniyyətə malik bir ölkə olduğunu vurğulayaraq, tədbirin həmin mədəniyyət ilə yaxından tanış olmaq imkanı baxımından əhəmiyyətini vurğulayıb. Ölkəmizin Koreya Respublikasındakı səfiri Rəmzi Teymurov xalqlarımız arasında qədim İpək yolu dövründə yaranmış əlaqələrin hazırda yeni formada inkişaf etdiyindən, bu istiqamətdə mədəni əməkdaşlığın vacib rolundan bəhs edib. Bakıdakı Şərq Təbabəti Klinikasının baş həkimi xanım Zərifə Quliyeva SEBA (Seul-Bakı) Azərbaycan-Koreya Mədəniyyət Mübadiləsi Assosiasiyasının sədri Ruhəngiz Heydərovanın təbrik məktubunu oxuyub. Sonra səhnə incəsənət ustalarının ixtiyarına verilib. Azərbaycan Mədəniyyəti Fondunun və SEBA (Seul-Bakı) Azərbaycan-Koreya Mədəniyyət Mübadiləsi Assosiasiyasının təşkilatçılığı, Mədəniyyət və Turizm Nazirliyinin, ölkəmizin Seuldakı səfirliyinin dəstəyi ilə keçirilən “Azərbaycan günü”ndə rəqqaslar, pianoçu və solistlər, saz ifaçıları koreyalı sənətsevərlər qarşısında milli musiqimizi təqdim etdilər. Proqrama Azərbaycan Dövlət Rəqs Ansamblının üzvlərinin ifasında “Cəngi”, “Nəlbəki”, “Qarabağ yallısı”, “İgidlər” xalq rəqsləri, Üzeyir Hacıbəylinin “Koroğlu” operasından “Qızların rəqsi”, “Odlar yurdu” (Eldar Mansurov) və “Qobustan” (Cavanşir Quliyev) rəqsləri ifa olundu. Əməkdar artist Munis Şərifovun bədii rəhbərliyi ilə Qədim Musiqi Alətləri Ansamblı, o cümlədən solistlər - Əməkdar artistlər Teyyub Aslanov və Nuriyyə Hüseynovanın ifasında “Bana, bana gəl” (Cahangir Cahangirov), “Bəri bax” və “Yaylığım” xalq mahnıları və “Qarabağ şikəstəsi” səsləndi. Bundan başqa, solistlər Əməkdar artist Anar Hüseynli və Lətifə Soyuöz, Naibə Şahməmmədova (piano) Üzeyir Hacıbəylinin “Arşın mal alan” operettasından Gülçöhrə və Əsgərin duetini, “Sarı gəlin” xalq mahnısını, “Xalq Heydər söyləyəcək” mahnısını ifa etdilər. Qəbələdən olan saz ifaçıları Nürəddin Xanlarov və Zeynəb Xanlarova koreyalı tamaşaçıları milli musiqimizin qədim janrlarından olan saz sənəti ilə tanış etdilər. “Azərbaycan günü” Müslüm Maqomayevin “Azərbaycan” mahnısının ifası ilə sona çatdı. Tamaşaçıların böyük diqqətlə izlədiyi konsertə yerli mətbuatın da marağı böyük idi. Qeyd edək ki, “Azərbaycan günü”ndən əlavə, incəsənət ustalarımız bir həftə ərzində hər gün iki dəfə mədəniyyət proqramı ilə çıxış edəcəklər.




 
Bölməyə aid digər xəbərlər
04.07.2020
“Turan eşqi” kitabı Azərbaycanda Atatürk Mərkəzi tərəfindən nəşr olunub
03.07.2020
Natəvan və Haqverdiyevlə bağlı televiziya filmləri hazırlanır
30.06.2020
Dizayner Gülnarə Xəlilova “İpək sərvət” adlı kolleksiyasını təqdim edib
30.06.2020
“İstedadlı uşaqların sorağında“ adlı Beynəlxalq Onlayn Festival keçiriləcək
28.06.2020
Litvanın Birştonas şəhərində tar, kamança, qaval büstü qoyulacaq

Şərh əlavə olunmayıb

    ,    
Tural RASİMOĞLU
Anar MİRİYEV
Ağasəf Babayev
Fuad HÜSEYNZADƏ
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 11546

1 Tural Gəncəliyev: “Dağlıq Qarabağ xalqı” deyə bir anlayış yoxdur, sadəcə Azərbaycanın Dağlıq Qarabağ bölgəsinin əhalisi anlayışı var
2 “Azərbaycanın olmadığı yerdə Türkiyə, Türkiyənin də olmadığı yerdə Azərbaycan var” - bu bizlərin şüarıdır…”
3 Prezident və birinci xanım İçərişəhərdə aparılan bərpa işləri ilə tanış olublar-YENİLƏNİB
4 Azərbaycan Prezidentinin təşəbbüsünə verilən dəstək beynəlxalq ictimaiyyətin ölkəmizə böyük etimadının göstəricisidir
5 Azərbaycan Turizm Agentlikləri Assosiasiyası və AZAL ikitərəfli əməkdaşlığı genişləndirir


© Copyright 1999-2019 "Palitra" müstəqil ictimai-siyasi qəzet
Azərbaycan, Bakı ş. Xətai rayonu, M.Mehdizadə-5, giriş 2
Tel/Fax.: (+99412) 489 08 53
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info