BP-də yüksək vəzifədə çalışan Leyla Novruzova: “Karyeramı planlamaqda çox da yaxşı deyiləm“
Tarix: 11.06.2018 | Saat: 11:46:00 | E-mail | Çapa göndər


BP-nin London ofisinin Qlobal Biznes Xidmətlərində insan resursları üzrə direktor təyin edilən Leyla Novruzovanın APA-nın London müxbirinə müsahibəsini təqdim edirik.
 
- İş həyatınızın başlanğıcı haqqında məlumat verə bilərsinizmi? İlk işiniz nə idi?
 

- Xarici Dillər Universitetinin 5-ci kurs tələbəsi olarkən Milli Məclisdə tərcüməçi işləməyə başladım. 1992-ci ildə mənim kimi gənc bir tələbə üçün dövlət adamlarına tərcüməçilik etmək böyük bir təcrübə idi.  Həmin il ən yadda qalan hadisə isə mənim Parlament Assambleyasının Yeni Dehlidəki iclasında Azərbaycan nümayəndə heyətinin tərcüməçisi olaraq Hindistana yola düşməyim oldu. Ölkəmi gənc yaşda təmsil edə bildiyim üçün böyük qürur duyurdum.
 
"Bir gün bir dostum mənə zəng edib, Bakıda açılan xarici şirkətlərdən birinə ingilis dilini bilən və kompüter anlayışı olan (yəni “Word”ü açıb-bağlamağı bacaran) insanlara ehtiyac olduğunu dedi"

 
Sonra bir gün bir dostum mənə zəng edib, Bakıda açılan xarici şirkətlərdən birinə ingilis dilini bilən və “kompüter anlayışı olan” (yəni kompüterdə “Word”ü açıb-bağlamağı bacaran) insanlara ehtiyac olduğunu dedi. Bu, AMOCO şirkəti idi və mən oraya müraciət etdim. Ofis köməkçisi olaraq işə başladım. Bu, mənim 25 illik yolumun başlanğıcı idi.
 
- Neft sektorunda uğur qazanmağın başlıca şərtləri nələrdir?
 
- Məncə, işlədiyiniz sektordan asılı olmayaraq, müvəffəqiyyətin ən böyük açarı çox çalışmaq, gördüyün işdən zövq almaq və böyüməyə davam etməkdir. Mən həmişə deyirəm ki, əlinizdən gələnin ən yaxşısını edin, yeni fürsətlər üçün daima ayıq olun və yeni imkanlarla qarşılaşdıqda onları buraxmayın. Məncə bu, uğurun açarıdır.
 
- İnsan resursları üzrə direktor vəzifəsi birbaşa işçilərlə təmasda olmağı, işə qəbulda yüksək həssaslığı tələb edir. Milli mənsubiyyətiniz və çalışdığınız insanların müxtəlif millətlərdən olması hansı məqamlarda sizə problem yaradır?
 
- İşimdən zövq almağımın səbəblərindən biri də odur ki, mənə müxtəlif ölkələrdən və mədəniyyətlərdən olan insanlarla işləmək imkanı verir. Hesab edirəm ki, kiminsə fərqli bir millətdən olması hər hansı bir problem təşkil etmir. Əksinə, şirkətdə müxtəlif millətlərdən insanların olması şirkəti daha da uğurlu edər. Mənə görə, insanların bir-birinə qarşı nəzakətsiz və hörmətsiz münasibəti problemlər yarada bilər, onların müxtəlif millətlərdən olması yox.
 
- Hər firmanın, iri şirkətin işçi qəbulu zamanı spesifik sualları olur və zaman keçdikcə bu suallar yenilənir, dövrün tələblərinə uyğunlaşdırılır. Sizin işçi qəbul edərkən suallar bankınız, istifadə etdiyiniz özəl testlər varmı?

 
- İki tip suallarımız  var: texniki və davranış. Texniki suallar namizədlərin təcrübə və bacarıqlarının iş tələblərinə uyğun olub-olmadığını müəyyənləşdirməyə kömək edir. Davranış sualları isə namizədin sərgilədiyi dəyərlərin şirkətimizin dəyərlərinə uyğun olub-olmadığını müəyyənləşdirməyə kömək edir. BP-nin güclü Dəyərlər və Davranışlar dəst-xətti var. Bunlar təhlükəsizlik, mükəmməllik, OneTeam (komanda olmaq), hörmət və cəsarətdir. Bütün İnsan Resurslarına aid suallar bu dəyərlərin dərk edilməsini nümayiş etdirməyə təşviq edir.
 
- Sizcə, BP markasına sədaqəti qorumaqda insan resurslarının rolu nədir?
 
- İnsan resursları işçilərin şirkətə sadiqliyini inkişaf etdirməkdə böyük rol oynayır. İş mühiti sağlam və narahatlıqdan uzaq olduqda işçilər sadiq olacaq. Güclü kadr şöbəsi işçilərlə proaktiv əlaqə yaratmaqla həmişə şirkətin nəbzində mühüm rol oynayacaq. Həmçinin, işçilərin hər hansı narahat olduqları bir məsələ barədə açıq şəkildə danışa biləcəyi təmin edilməlidir. İşçilər təşkilatın həyatına müsbət təsir göstərə biləcəklərini, şirkəti davamlı inkişaf etdirə biləcəklərini hiss etdikdə, onların şirkətə sadiqliyi daha da artacaq.
 
- Bu mərhələyə gələnə qədərki karyera mərtəbələriniz barədə danışa bilərsiniz?
 
- İnsan resurslarında ilk rolum 2000-ci ildə “benefits advisor” (Müavinətlər haqqında məsləhətçi) rolu idi. Bu, BP və AMOCO birləşməsindən və birləşən şirkətin xarici şirkətlər konsorsiumu olan ABƏŞ-in (Azərbaycan Beynəlxalq Əməliyyat Şirkəti) vahid operatorluğunu almasından dərhal sonra idi.
 
"Mənim ilk insan qaynaqları ilə əlaqəli layihələrimdən biri müxtəlif şirkətlərdən gələn işçilər üçün şərtləri və müavinətlərini uyğunlaşdırmaq idi. Daha sonra BP-nin digər bölmələrində də oxşar təcrübə tələb olundu və ilk olaraq Pakistan və sonra Rusiyada işləmək imkanları yarandı"

 
Mənim ilk insan qaynaqları ilə əlaqəli layihələrimdən biri müxtəlif şirkətlərdən gələn işçilər üçün şərtləri və müavinətlərini uyğunlaşdırmaq idi. Daha sonra BP-nin digər bölmələrində də oxşar təcrübə tələb olundu və ilk olaraq Pakistan və sonra Rusiyada işləmək imkanları yarandı. Bu sahədə ilk yüksək vəzifəli rolum isə 2007-ci ildə oldu və üç il sonra ABŞ-ın Hyuston şəhərində işləmək üçün seçildim. Fərqli yerlərdə fərqli işlər görmək mənə bacarıqlarımı inkişaf etdirmək və 2013-cü ildə başlayan İnsan resursları üzrə vitse-prezident rolunda uğurlu olmağa kömək edib.
 
- Pakistan, Rusiya, ABŞ kimi müxtəlif ölkələrdə çalışmısınız. Bu ölkələrdə yaşamaq və işləmək sizə nələr verib?

 
- Fərqli ölkələrdə yaşamaq imkanı mənim həyatımda baş verən ən yaxşı şeylərdən biri idi. Alışdığınız və rahat hiss etdiyiniz mədəniyyət və mühitdən çıxdıqdan sonra siz həm peşəkar, həm də şəxsi həyatınızda böyüyürsünüz.
 
"Sizə çox demək istəyərdim ki, 5 ildən sonra özümü müəyyən bir yerdə, rolda görürəm, ancaq bunu deyə bilmərəm. 5 ildən sonra hansı imkanların yaranacağını kim bilə bilər? Ancaq onu deyə bilərəm ki, ümidvaram məni həyəcanlandıran bir yerdə olacağam"
 
Həm də yeni insanlarla tanış olmaq, dost olmaq şansınız olur. Yaşadığınız müxtəliflik sizi daha yaxşı insan edir və üfüqünüzü, dünyaya, həyata baxışınızı genişləndirir.
 
- İnsan resurslarında karyera arzulayanlara nə məsləhət verərdiniz?
 
- Qorxmayın! Mən insan resursları sahəsində fəaliyyətimə 18 il əvvəl başladım və bir dəfə belə bu barədə təəssüflənmədim. Güclü insan resursları idarəsi, güclü təşkilat deməkdir. Unutmamaq lazımdır ki, doğru insanların doğru rollarda olması müvəffəqiyyətin mahiyyətini təşkil edir.
 
- İşə qəbul zamanı verilən ən klassik sual budur: 5 il sonra özünüzü harada görürsünüz? Sizin bu suala cavabınızı bilmək maraqlı olardı. Siz 5 il sonra özünüzü harada görürsünüz?
 
- Sizinlə bir sirr paylaşmalıyam. Bir insan resursları üzrə vitse-prezident olaraq bu cavabım qəribə səslənə bilər, ancaq mən karyeramı planlamaqda çox da yaxşı deyiləm. Sizə çox demək istəyərdim ki, 5 ildən sonra özümü müəyyən bir yerdə, rolda görürəm, ancaq bunu deyə bilmərəm. 5 ildən sonra hansı imkanların yaranacağını kim bilə bilər? Ancaq onu deyə bilərəm ki, ümidvaram məni həyəcanlandıran bir yerdə olacağam.




 
Bölməyə aid digər xəbərlər
13.08.2018
“Beynəlxalq Gənclər Günü gənclərin beynəlxalq aləmə inteqrasiyasına təkan vermək məqsədilə qeyd olunur”
10.08.2018
Bəzən fermerlər təyinatı, mənşəyi bilinməyən əkin materialını bazardan alıb toxum kimi səpirlər
07.08.2018
Leyla Hüseynova: “Dənizçilik həyatımın anlamıdır”
06.08.2018
“Rusiya və Azərbaycanın strateji əməkdaşlığı dərin tarixi köklərə malikdir”
01.08.2018
“Yaşlı nəsil özündən sonra yeni nəsil diaspor yetişdirməlidir”

Şərh əlavə olunmayıb



    ,    
Namiq Əliyev
Tural Tağıyev
Ülviyyə Həsənzadə
İsa Həbibbəyli
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 9858

1 DSX rəisi at çapan qızla görüşüb
2 Karen Veranyan: “İrana qarşı yeni sanksiyalar Ermənistan iqtisadiyyatına ağır zərbə vuracaq”
3 “Hər yaşa uyğun uşaq intellektual oyunları və videolar hazırlamışıq”
4 “Azərbaycan qadınları cəmiyyətdəki aktual problemlərin həllindən kənarda qalmırlar”
5 ABŞ saytında azərbaycanlı rəssamın müsahibəsi dərc olunub


© Copyright 1999-2013 "Palitra" müstəqil ictimai-siyasi qəzet
Azərbaycan, Bakı ş. Sahib Zeynalov 15/31
Tel/Fax.: 441-39-97, Tel: 449-55-46
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info