“Dopdolu bu dünya kəmdi gözümdə ... “
Tarix: 24.09.2018 | Saat: 19:38:00 | E-mail | Çapa göndər


Bu dəfə şeirlərini təqdim etdiyimiz şair Etibar Vəliyevdir. Etibar Vəliyev 1963-cü il may ayının 16-da Lənkəran rayonunun Ləj kəndində anadan olub. Burada səkkizillik kənd məktəbini bitirdikdən sonra 1978-1981-ci illərdə Bakı Plan-Uçot Texnikumunda təhsil alıb. 1981-ci ildən Lənkəran rayonunun “Lənkəran çay” sovxozunda fəhlə işləyib. Hərbi xidməti borcunu 1981-1983-cü illərdə yerinə yetirib. Tərxis edildikdən sonra yenə sovxozda fəhləlik edib. Lənkəran rayonunun “Puşkin”, “Oktyabrın 60 illiyi” sovxozlarında iqtisadçı və 1988-1998-ci illərdə Lənkəran “5 №-li çay fabriki”ndə baş mühasib işləyib. Bu müddət ərzində Azərbaycan Kənd Təsərrüfatı Akademiyasında qiyabi təhsil alıb. Hazırda Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin 9 saylı region üzrə Dövlət Əmək Müfəttişliyində baş məsləhətçi-baş əmək müfəttişi işləyir. Ədəbi fəaliyyətlə XX əsrin 70-ci illərindən məşğul olur. Dövri mətbuatda və almanaxlarda şeirləri vaxtaşırı dərc edilir. İlk şeiri indiki “Lənkəran” qəzetində çap olunub. “Görüşə gəl”, “Baxmağa dəyər”, “Mənim Duyğum” adlı şeirlər kitabının müəllifidir. “Məşəl” ədəbi-bədii, elmi-publisistik jurnalın məsul katibidir. “Qızıl Qələm” və Azərbaycan Jurnalistlər Birliyinin “Həsən bəy Zərdabi” fəxri media mükafatlarına layiq görülüb. Azərbaycan Yazıçılar Birliyinin və Azərbaycan Jurnalistlər Birliyinin üzvüdür.



KÖNLÜNÜ ALIB GEDƏSƏN

Qarşından bir gözəl keçə,
Xəyala dalıb gedəsən.
Sonra da gül camalına,
Könlünü salıb gedəsən.

Talehinlə barışasan,
Söhbətinə qarışasan.
Şirin-şəkər danışasan,
Könlünü alıb gedəsən.

Bəxtin açılsın, ay lələ,
Belə məqam düşməz ələ.
Söhbətin ona xoş gələ,
Yadında qalıb gedəsən.

Gəlib yanında qalasan,
Onun qadasın alasan.
İlləri yola salasan,
Sonra qocalıb gedəsən.
30.12.2017


DÜNYA GÖZÜM BOYDADI

İçimdə bir mən yatır,
O mən özüm boydadı.
Dünya gördüyüm boyda,
Dünya gözüm boydadı.

Tarda muğam, şur yanır,
İçimdə bir nur yanır.
Baxma odum gur yanır,
Yaram közüm boydadı.

Dağlar düzdən yuxarı,
Şaxta buzdən yuxarı.
Səbir üzdən yuxarı,
Səbrim dözüm boydadı.

Bu dünya özü boyda.
Ocağı közü boyda.
Hər adam sözü boyda,
Boyum sözüm boydadı.
25.12.2017


GEDƏSƏN

Dərd əlindən bulud kimi
Boşalıb, dolub gedəsən.
Özün özünə ağlayıb,
Saçını yolub gedəsən.

Bir gün düzələsən yola,
Yaşın ötə, ömür dola.
Nə ağrı, nə acı ola,
Gül kimi solub gedəsən.

Cütlüklər verə qol-qala,
Qonaq gələ, mağar dola,
Ölüm də toy kimi ola,
Sən hazır olub gedəsən.

Məclis ola, yas olmaya,
Göz ağlaya, yaş olmaya,
Qalası miras olmaya,
Varını bölüb gedəsən.

Halını pozma, ay lələ.
Son qonağın gələr hələ.
Qapına Əzrail gələ,
Üzünə gülüb gedəsən.

Hər gün Xuda günü gələ,
Bir gün vida günü gələ,
Ruhun cuda günü gələ,
Sonra da ölüb gedəsən.
11.12.2017



GÖZÜMDƏN DÜŞÜR

Gözüm hər şeydən uca,
Göydə, asimandadı.
Ən uca dağ başında,
Çəndədi, dumandadı.
Gözlərimdə hər nə var,
Düşə bilər bir anda.
Göylərdə topa-topa,
Buludlar toqquşanda,
Şimşək gözümdə çaxır,
Yağış gözümdən düşür.

Gözlərim ürəyimin,
Görünən aynasıdı.
Mənim qəlbimi didən,
Məzlumun göz yaşıdı.
Yuxum ərşə çəkilir,
Onu qəmli görəndə.
Eşqi nakam olanı,
Gözü nəmli görəndə.
Gözlərimə yaş gəlir,
Damla gözümdən düşür.

Sevgi başımın tacı,
Ürəyin cövhəridi.
Ömrümün gecələri,
Açılan səhəridi.
Sevginin işiğından,
Gözümə nur saçılır.
Yumuram gözlərimi,
Bəzən gözüm açılır.
Xəyanəti görəndə,
Sevgi gözümdən düşür.

Biz Adəm övladıyıq,
Dost olaq, qardaş olaq.
Dərdimizi bölüşək,
Qoruyaq sirdaş olaq.
İnsanı tanımadım,
Hələ mən bu yaşımda.
Kəm görmək istəmədim,
Dostumda, tanışımda.
Hiylə, kələk görəndə,
İnsan gözümdən
Elə bil ki, bu dünya,
Bir gözünü bağlayıb.

Ədaləti, haqqı da,
Bağlı gözdə saxlayıb.
Bu səbəbdən dünyada,
Nahaq qanlar tökülür.
Gözümüzün önündə,
Haqqın evi sökülür.
Ədalət pozulanda,
Dünya gözümdən düşür.
12.02.2016



MƏNİ SEVƏ BİLƏRSƏNMİ?

Əyər sənə könül versəm,
Məni sevə bilərsənmi?
Gah ağlasam, gah da gülsəm,
Məni sevə bilərsənmi?

Qışa bənzər yazım olsa,
Kökdən düşən sazım olsa,
Bir ədalı nazım olsa,
Məni sevə bilərsənmi?

Üzüyümə qaş bağlasam,
Gözlərimi yaş bağlasam,
Ürəyimə daş bağlasam,
Məni sevə bilərsənmi?

Mən sözə məftun adamam,
Qururlu, mətin adamam,
Bir az da çətin adamam,
Məni sevə bilərsənmi?

Əhdim, ilqarım düz olsa,
Yaşım əlli, ya yüz olsa,
Əlim, ürəyim buz olsa,
Məni sevə bilərsənmi?
07.11.2017



MƏNDƏ QALIB

Hara getdin, a zalım?
Yarağın məndə qalıb.
Saçlarına çəkdiyin,
Darağın məndə qalıb.

Ağlayıram, gülürəm,
Göz yaşımı silirəm.
Deməsən də bilirəm,
Marağın məndə qalıb.

Kor olmuşam tüstümə,
Qayıt, məni küsdürmə.
Yetən gəlir üstümə,
Sorağın məndə qalıb.

Sənsən məni qandıran,
Qələmimi sındıran,
Sən gecələr yandıran,
Çırağın məndə qalıb.
27.10.2017


YARAŞMIR

İçim qəm ağlayır, üzüm də gülmür.
Bizə bu ayrılıq yaraşmır, gülüm.
Sənsiz çıxan günəş gözümə düşmür,
Bizə bu ayrılıq yaraşmır, gülüm.

Dopdolu bu dünya kəmdi gözümdə.
İçmişəm, sərxoşam, qəmdi gözümdə,
Bir az ağlamışam nəmdi gözümdə,
Bizə bu ayrılıq yaraşmır, gülüm.

Bağban vurulubdu bağ çiçəyinə,
Mahnı qoşulubdu ağ çiçəyinə,
Yenə qovuşubdu dağ çiçəyinə,
Bizə bu ayrılıq yaraşmır, gülüm.

Babamın babası Vəli gedibdi,
Atamın babası Əli gedibdi,
Ömrümə nə qaldı, əlli gedibdi,
Bizə bu ayrılıq yaraşmır, gülüm.
10.10.2017

BƏHANƏ

Dünya yalan dünyadı, burda adəm oğlunun
Ölümü həqiqətdir, doğuşu bəhanədir.
Hər xəstəlik, hər mərəz ölümə səbəb deyil,
Əcəl tamam olubsa, naxoşu bəhanədir.

Ağacın barı yoxsa, bağın günahı yoxdu.
Ağa qara düşübsə, ağın günahı yoxdu.
Çətin zirvə yolunda dağın günahı yoxdu.
Enişdə büdrəyənə yoxuşu bəhanədir.

Ömür telə bağlıdı, kəsildı, el apardı,
Yerdə qasırğa oldu, deyirlər, yel apardı.
Nə bilim, yağış yağdı, nə bilim, sel apardı,
Göydən yağan leysanı, yağışı bəhanədir.

Deyirlər, yanğın olub, oduna köz dəyibdi,
Ürəyi qırılıbsa, qəlbinə söz dəyibdi.
Nə bilim, gözə gəlib, nə bilim, göz dəyibdi.
Göygözün, bədnəzərin baxışı bəhanədir.

Bu dünyanın əvvəli, həm də sonu yazılıb.
İnsanın hər əməli, səsi, ünü yazılıb.
İnsan doğulan günü, gedən günü yazılıb.
Bu taleyin, bu bəxtin naxışı bəhanədir.
12.10.2017

Şeirləri toplayıb təqdim etdi:
Mahmud Əyyublu
AAB-nin üzvü




 
Bölməyə aid digər xəbərlər
13.12.2018
Özü ölsə, sözü ölməz ustadin
13.12.2018
Xalq rəssamı Tahir Salahovun 90 illik yubileyinə həsr olunmuş sərgi açılacaq
13.12.2018
Vyanada “Əbədi ezamiyyət” sənədli filminin təqdimatı olub
12.12.2018
Şair Vəli Bozalqanlı irsinin axtarışında...
11.12.2018
“Kitob dunyasi” qəzetində Maqsud Şeyxzadə haqqında məqalə dərc edilib

Şərh əlavə olunmayıb



    ,    
Namiq Əliyev
Tural Tağıyev
Namiq Əliyev
Namiq Əliyev
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 10527

1 “Macarıstandakı Azərbaycan icmasının böyük əksəriyyətini gənclər təşkil edir”
2 Bill Klinton Heydər Əliyevlə görüntülərini paylaşdı
3 “Xəzər hövzəsi və enerji təhlükəsizliyi” - Rufiz Qonaqov yeni kitabını təqdim etdi
4 Əli Həsənov: “Nə qədər Azərbaycan var, Heydər Əliyevin ideyaları yaşayacaqdır...”
5 OPEK-ə üzv ölkələr neft hasilatını azaltmaq barədə razılığa gəliblər


© Copyright 1999-2013 "Palitra" müstəqil ictimai-siyasi qəzet
Azərbaycan, Bakı ş. Sahib Zeynalov 15/31
Tel/Fax.: 441-39-97, Tel: 449-55-46
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info