Deyişmələr poeziyada xüsusi əhəmiyyətə malikdir
Tarix: 16.11.2018 | Saat: 19:50:00 | E-mail | Çapa göndər


Südabə İrəvanlı 1962-ci il yanvar ayının 7-də anadan olub. “Aşıq Pəri” məclisinin, Azərbaycan Yazıçılar Birliyinin üzvüdür.
Taleh Cəfəroğlu 1979-cu il oktyabr ayının 10-da Kəlbəcər rayonunda anadan olub. Goranboy rayon Eldar Hümbətov adına 63 nömrəli tam orta məktəbin ibtidai sinif müəllimidir.

Deyişmə I
Südabə İrəvanlı
Dağlarda çiçəyəm, zirvədə qaram,
Uzatma əlini, çatan ha deyil.
Göz yaşım dəryadı, naləm fırtına,
Dalğası səngiyib yatan ha deyil.

Taleh Cəfəroğlu
Uzaq durma, ay elimin gözəli,
Hər gözəl könlümə yatan ha deyil.
Yüz gözəl bəzənə çıxa qarşıma,
İrəvan qızına çatan ha deyil.

Südabə İrəvanlı
Eşqim bir gəmidir açıq dənizdə,
Arzum gül açıbdı dərədə, düzdə.
Yusif-Züleyxatək istədik biz də,
Ürək sevdiyini atan ha deyil.

Taleh Cəfəroğlu
Ruhuma dolandın, aldın könlümü,
Birinci baxışdan çaldın könlümü.
Bircə sən kəməndə saldın könlümü,
Özgənin qoynunda yatan ha deyil.

Südabə İrəvanlı
Bir nurlu səhərdi, bir aylı gecə,
Poladdan möhkəmdi, şüşədən incə.
Südabə sözündən dönməz ölüncə,
Özgənin əlini tutan ha deyil.

Taleh Cəfəroğlu
Talehə ruh verir belə məhəbbət,
Sözündən dönənə min dəfə lənət.
Tikanlı çiçəksən, bilirəm əlbət,
Tikanın əlimə batan ha deyil.

Deyişmə II
Taleh Cəfəroğlu
Baxışların qiymətlidi canımdan.
Bax üzümə gül, məzəli-məzəli.
Kim əl çəkər sənin kimi gözəldən,
Dur yanıma gəl, məzəli-məzəli.

Südabə İrəvanlı
Kaş ki, yenə yar başıma dolana,
Baxa, vura göz, məzəli-məzəli.
Buz ürəyim küləş kimi od ala,
Alovlana köz, məzəli-məzəli.

Taleh Cəfəroğlu
Bir busə ver bal süzülən dodaqdan,
Həsrətinə gör dözürəm nə vaxtdan.
Eyvana çıx, qaş-göz oynat uzaqdan,
Eylə mənə əl, məzəli-məzəli.

Südabə İrəvanlı
Göydən yerə leysan belə ələsə,
Dayanmaya, görüşümə tələsə.
Sevincimdən dil tutula, əl əsə,
Gülümsünə üz, məzəli-məzəli.

Taleh Cəfəroğlu.
O camalın bu Talehlə tərsi nə?
Qoy açılsın gözəl əndam, tər sinə.
Qıyqacı bax, canımı al tərsinə,
Qoy danışsın dil, məzəli-məzəli.

Südabə İrəvanlı
Südabənin hər nazını çəkə yar,
Göz yaşını dodağına bükə yar.
Deyəndə ki, dərdim dağdan yekə, yar.
Gülə deyə, döz, məzəli-məzəli.

Deyişmə III
Taleh Cəfəroğlu
Necə düşünürsən bu ayrılığa,
Yas tutub gizlicə ağlamışammı?
Hərdən xəyalının qonağı olub,
Açıb xatirəni bağlamışammı?

Südabə İrəvanlı
Səni düşünürəm hər saat, hər gün,
Olub keçənləri unutmaq çətin.
Elə bil yolları tilsimə düşüb,
Niyəsə bu eşqin, bu məhəbbətin.

Taleh Cəfəroğlu
Necə düşünürsən, səni unudub
Səni başqasına dəyişdimmi mən?
Sənin xəyalınla qol-boyun olub,
Sənin həsrətinlə döyüşdümmü mən?

Südabə İrəvanlı
Səni düşünürəm, səni hər gecə,
Gəzirəm göylərin yeddi qatında.
Sıxılıb qoynuna körpə uşaqtək,
Uçuram xəyalın qanadlarında.

Taleh Cəfəroğlu
Necə düşünürsən, yaz, mənə göndər.
Nə arzu tutmusan bu gələn yaza?
Açıq qoy qəlbini, qoy alım xəbər,
Nə arzu gətirim sevdiyim qıza?

Südabə İrəvanlı
Səni düşünürəm, dodaqlarımda
Bir həsrət nəğməsi inləyir hər gün.
Gözümün yaşını silir küləklər,
Dərdimi buludlar dinləyir hər gün.

Taleh Cəfəroğlu
Necə düşünürsən, mənim yoxluğum,
Səni məndən uzaq eyləmədi ki?
"O bir vəfasızdır, gəl unut" deyib,
Kimsə qulağına söyləmədi ki?..

Südabə İrəvanlı
Səni düşünürəm, tükənir dözüm,
Bəzən istəmirəm çıxam sabaha.
Sənsiz heç kim, heç nə gərəyim deyil,
Nə qədər dözəcəm, bilmirəm daha.

Taleh Cəfəroğlu
Necə düşünürsən, necə, sən Allah,
Yamanca soyuğam, daş ürəyəmmi?
Zalım ayrılığın qəlbini qırıb,
Qayıdıb yanına gələcəyəmmi?

Südabə İrəvanlı
Səni düşünürəm, yatammıram ki...
Qalıram gümanın qaranlığında.
Bu mən deyiləm ki, itib qalmışam,
Sənli günlərimin dumanlığında.

Deyişmə IV
Taleh Cəfəroğlu
Gəlmişəm üzündən siləm kədəri,
Gəlmişəm könlünü alım mən sənin.
Gəlmişəm yanından qovum dərdləri.
Gəlmişəm yanında qalım mən sənin.

Südabə İrəvanlı
Bu eşqin nağıllı çağları kimi,
Gəl yenə oturaq qabaq-qabağa.
Sevginin müqəddəs ocağı kimi,
And içək, əl basaq yanan çırağa.

Taleh Cəfəroğlu
Gəlmişəm yapışam gül əllərindən,
Qoxlayım telini, qoxlayım, gülüm.
Gəlmişəm tanıyam səni dərindən.
Alım ürəyimdə saxlayım, gülüm.

Südabə İrəvanlı
Dolubdu gözlərim, bulud kimiyəm,
Yağmaq istəyirəm gedib təkliyə.
Elə narahatam, elə qəmliyəm,
Qorxuram mən səni itirəm deyə.

Taleh Cəfəroğlu
Gəlmişəm baharın nəfəsi kimi,
Yox edim soyuğu yanaqlarından.
Gəlmişəm ilk eşqin həvəsi kimi,
Sevgi payı alım dodaqlarından.

Südabə İrəvanlı
Bivəfa olubdu bəşər övladı,
Deyirəm, bəlkə də, atarsan məni.
Güldürüb üstümə özgəni, yadı,
Gözümün yaşına qatarsan məni.

Taleh Cəfəroğlu
Gəlmişəm qapına ümidimlə mən,
Gəl məni qapından boş yola salma.
Gəlmişəm dünyaya tək sənə görə,
Gəl məni gözümdə yaş yola salma.

Südabə İrəvanlı
Olub keçənləri unutmaq çətin,
Daha həsrətinə dözmürəm fəqət.
Gəlməsən öldürər məni həsrətin,
Gəlməsən qəlbimi yandırar həsrət.

Taleh Cəfəroğlu
Gəl nazlı mələyim, anla dilimdən,
Götürək aradan küskünlüyümüzü.
Barış taleyinlə, yapış əlimdən,
Hamı qoşa görsün hər zaman bizi.

Südabə İrəvanlı
Südabən dözməyir ayrılığına,
Gəl çıx sınağımdan alnıaçıq sən!
Qıyma Südabənin kül olmağına,
Axı həsrətinə dözəmmirəm mən!

Deyişmə V
Südabə İrəvanlı
Damcı kimi qayalardan süzülən
Selimə aparır məni bu sevgi.
O məni istəyən, o məni sevən
Dəlimə aparır məni bu sevgi.

Taleh Cəfəroğlu
Həsrətinə dayanmadı, dözmədi,
Yenə görüşünə gəldi bu sevgi.
Yorulmadı, usanmadı, bezmədi,
Yenə görüşünə gəldi bu sevgi.

Südabə İrəvanlı
Bu qədər hicrana dözə bilmirəm,
Bağlandım alova, közə, bilmirəm.
Niyə bu sevdadan bezə bilmirəm,
Zülümə aparır məni bu sevgi.

Taleh Cəfəroğlu
Çöhrəsi kədərli, baxışı qəmli.
Qəlbi para-para, gözləri nəmli.
Dodağı nəğməli, əli qələmli,
Yenə görüşünə gəldi bu sevgi.

Südabə İrəvanlı
Daha qalmayıbdı bir sevinc, nəşə,
Eşqin sitəminə dözdüm həmişə.
Kababtək bağrımı çəkibdi şişə,
Külümə aparır məni bu sevgi.

Taleh Cəfəroğlu
Sadiq oldu, dəyişmədi yolunu,
Yerdə səni seçdi, göydə ulunu.
Acdı qucağını, açdı qolunu,
Yenə görüşünə gəldi bu sevgi.

Toplayıb tərtib etdi:
Mahmud Əyyublu
AAB-nin üzvü




 
Bölməyə aid digər xəbərlər
11.12.2018
“Kitob dunyasi” qəzetində Maqsud Şeyxzadə haqqında məqalə dərc edilib
11.12.2018
İstanbulda “İrəvan - gizlədilmiş həqiqətlər” filminin təqdimatı olub
10.12.2018
“Çarəsiz sərnişinlər” tamaşasının məşqlərinə start verilib
10.12.2018
Tural Turanın şeirlər kitabının imza günü keçiriləcək
10.12.2018
Azərbaycan ifaçısı Riqa musiqi festivalının Qran-pri mükafatına layiq görülüb

Şərh əlavə olunmayıb



    ,    
Namiq Əliyev
Tural Tağıyev
Namiq Əliyev
Namiq Əliyev
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 10524

1 “Macarıstandakı Azərbaycan icmasının böyük əksəriyyətini gənclər təşkil edir”
2 Prezident İlham Əliyev Putinin dəvəti ilə Rusiyaya işgüzar səfərə gedib- YENİLƏNİB
3 Türkiyədə yeni Azərbaycan diaspor təşkilatı qeydiyyatdan keçib
4 “Özümü qərib ölkədə hiss etmədim”
5 Çin şirkəti Gəncədə 5 metallurgiya zavodu tikəcək


© Copyright 1999-2013 "Palitra" müstəqil ictimai-siyasi qəzet
Azərbaycan, Bakı ş. Sahib Zeynalov 15/31
Tel/Fax.: 441-39-97, Tel: 449-55-46
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info