“Qarabağ münaqişəsinin həlli yoxdur”
Rus deputatdan şok sözlər “Hazırda Dağlıq Qarabağ münaqişəsinin siyasi həlli mümkün deyil”.
Turkustan.info xəbər verir ki, bunu Rusiya Federasiya Şurası Xarici İşlər Komitəsi rəhbərinin birinci müavini Vladimir Cabarov deyib.
Rusiyalı deputat münaqişənin həll prosesinin dalana dirəndiyini bildirib:
“Bu, postsovet məkanında ən inadkar münaqişələrdən biridir. Təəssüf ki, bu gün tərəflərin mövqeləri tamamilə bir-birinə ziddir. Əgər mənim subyektiv fikrimlə maraqlanırsınızsa, bu münaqişənin siyasi həlli yoxdur. Ancaq şübhəsiz ki, bu münaqişənin hərbi həlli də yoxdur. Uzun və çətin danışıqlara ehtiyacımız var. Ən əsası, bütün tərəflər qarşılıqlı güzəştlərə və hətta güzəştli qərarlara hazır olmalıdır”.
Onun sözlərinə görə, münaqişənin həll prosesi uzun vaxt apara bilər:
“Həqiqətən keçən 30 il ərzində Sovet İttifaqı dövründə iki xalqın – ermənilər və azərbaycanlıların dinc yaşadığını bilməyən iki nəsil böyüdü. Amma bilirsiniz, mən nikbinəm və inanıram ki, hər üç Qafqaz respublikası – Azərbaycan, Gürcüstan və Ermənistan bir-birləri üçün yaxşı qonşular olacaq. Ən əsası onlar ölkəmizin böyük dostlarıdır. Rusiya ilə dostluq onlara firavanlıq və müstəqillik təmin edə bilər”.
Cabarov vurğulayıb ki, Rusiya Ermənistan və Azərbaycanın sülh şəraitində yaşaması üçün ciddi maraq göstərir:
“Ancaq inteqrasiya prosesləri çərçivəsində, məsələn, iqtisadi sahədə birgə iş iki ölkəni birləşdirə bilər. İndi azərbaycanlılar və ermənilər MDB çərçivəsində səssiz ünsiyyət qururlar, bilirəm ki, bunu gündəlik səviyyəsində də etmək mümkündür, hər iki tərəf də bunu istəyir. Bunun üçün ortaq fikir axtarmaq lazımdır. Regional inteqrasiya birlikləri çərçivəsində parlamentlərarası dialoq müsbət rol oynaya bilər “.
Bununla yanaşı, o qeyd edib ki, Rusiya münaqişədə Ermənistanın və ya Azərbaycanın mövqeyini tam qəbul edə bilməz:
“Hamımız böyük bir ölkəni (SSRİ) tərk etdik və hər iki respublika bizim üçün eyni dərəcədə əzizdir. Məncə, Azərbaycanla münasibətlərin pisləşməsi səbəbindən Ermənistanla münasibətləri düzəldə bilmərik. Və əksinə…”.

Xəbər 112 dəfə oxundu.